ភ្នំពេញ៖ រាជធានីភ្នំពញមានគម្រោងវិនិយោគថ្មីៗទៅលើវិស័យសំណង់ដែលមានជាង១ពាន់គម្រោង ដែលមានទំហំទឹកប្រាក់ជាង២ពាន់ដុល្លារគិតត្រឹមដើមឆ្នាំ២០២២។ នេះបើតាមការបញ្ជាក់របស់អភិបាលរាជធានីភ្នំពេញលោក ឃួង ស្រេង ក្នុងពិធីបើកការដ្ឋានសំណង់លំនៅដា្ឋនមួយកន្លែងនៅតំបន់បឹងតាមោកនាថ្ងៃទី១០ ខែមីនា ឆ្នាំ២០២២។
លោក ឃួង ស្រេង បានឲ្យដឹងថាគិតត្រឹមដើមឆ្នាំ២០២២នេះ នៅរាជធានីភ្នំពេញមានសំណង់បុរី និងបណ្ដុំផ្ទះល្វែងចំនួន ៣១០កន្លែង និងអគារខ្ពស់ៗចំនួន ១ ៦០៣អគារ ក្នុងនោះអគារកម្ពស់ចាប់ពី២០ជាន់ឡើងទៅមានចំនួន២២៥អគារ។
លោកបន្តថា ក្នុងឆ្នាំ២០២១ ភ្នំពេញទទួលបានគម្រោងសាងសង់ថ្មីៗពីវិស័យឯកជនចំនួន ១ ០៥០គម្រោង លើផ្ទៃក្រឡាសំណង់សរុបជាង ៤,៦៣លានម៉ែត្រក្រឡា ដែលមានទំហំទុនវិនិយោគប៉ាន់ស្មានជាង ២,២៦ពាន់លានដុល្លាអាមេរិក។
លោកបន្តទៀតថា កំណើនសេដ្ឋកិច្ចកម្ពុជាត្រូវបានប៉ាន់ស្មានថានឹងបន្តងើបឡើងវិញនៅឆ្នាំខាងមុខស្របតាមការកើនឡើងនូវតម្រូវការសកល និងទំនុកចិត្តរបស់វិនិយោគគិនទាំងក្នុងស្រុក និងបរទេសដែលជាសក្តានុពលដ៏ធំសម្រាប់ការវិនិយោគក្នុងវិស័យអចលនទ្រព្យ ជាពិសេសអគារពាណិជ្ជកម្ម សណ្ឋាគារ សំណង់បុរី ដីឡូតិ៍ អគារស្នាក់នៅរួមនិងខុនដូទំនើបៗ៕
